Novo proxecto cofinanciado pola Unión Europea para impulsar a igualdade de xénero nas políticas locais
A Asociación Forgender Seal obtivo financiamento da Unión Europea para desenvolver o proxecto DIXECP (Distintivo pola Igualdade de Xénero en Pobos e Cidades). Este distintivo, respaldado pola UE, certificará o compromiso dos municipios coa igualdade de xénero, promovendo a incorporación da perspectiva de xénero nas súas políticas e actuacións.
O pasado 21 de febreiro celebrouse a 1.ª Reunión de Coordinación do proxecto DIXECP, liderado pola asociación Forgender Seal (Barcelona) e a empresa INDA Iniciativas, S. L. (A Coruña), co cofinanciamento da Unión Europea no marco do seu compromiso coa igualdade e o desenvolvemento sustentable.
O proxecto DIXECP establece un estándar de certificación deseñado conforme as competencias municipais, a normativa estatal e os tratados internacionais en materia de igualdade de xénero e dereitos humanos. A través dun proceso de avaliación e certificación, os municipios poderán obter o distintivo pola Igualdade de Xénero, o que lles permitirá acceder a recursos e visibilidade como administracións comprometidas coa equidade de xénero
Grazas aos fondos europeos asignados ao proxecto, os municipios que participen no proceso de certificación recibirán apoio financeiro para desenvolver as accións necesarias para a obtención do distintivo.
O obxectivo principal do Distintivo DIXECP é garantir a integración da perspectiva de xénero de maneira transversal e interseccional nas políticas municipais, contribuíndo á efectividade dos dereitos das mulleres e ao benestar de toda a cidadanía. Como sinala Marta Macias, presidenta da Asociación Forgender Seal: «O proceso de certificación DIXECP fortalece a imaxe dos concellos como administracións comprometidas coa igualdade e os dereitos das mulleres».
Ademais, o proxecto busca crear unha Rede de Municipalidades pola Igualdade de Xénero e a Corresponsabilidade nos usos do Tempo, promovendo o intercambio de boas prácticas e a aprendizaxe colaborativa.
Nos próximos meses, lanzarase unha campaña de sensibilización e levaranse a cabo sesións informativas sobre o distintivo. Así mesmo, en 2025 e 2026 celebraranse dúas edicións do Fórum de Municipios Certificados, un espazo de diálogo e intercambio de experiencias sobre igualdade de xénero na xestión municipal. Abordaranse temas clave como a fenda de xénero nos coidados, o recoñecemento do traballo de coidado, e estratexias para desmontar estereotipos que perpetúan a división do traballo por xénero.
Para máis información, contactar con:
Marta Macias
📩 mmacias@forgenderseal.org / premsa@forgenderseal.org
📞 630 108 987